Cəmiyyətdə sensasiya yaradan hadisə | "Sevgi evi"nin rəhbəri yenidən iş başında - Baku TV

2022-ci ildə “Sevgi evi” qadın və uşaq sığınacağında azyaşlıların işgəncəyə məruz qalması ilə bağlı yayılan məlumatlar cəmiyyətdə ciddi rezonans doğurmuşdu.

Sığınacağın rəhbəri Könül Qasımova Cinayət Məcəlləsinin 133-cü – əzab vermə maddəsi ilə ittiham olunaraq məhkəmə qarşısına çıxarılmışdı.

Sabunçu Rayon Məhkəməsinin hökmü ilə K.Qasımovaya 2 il müddətinə azadlıqdan məhrumetmə cəzası təyin edilmişdi. Daha sonra himayəsində azyaşlı övladının olması nəzərə alınaraq, qanunvericiliyə uyğun şəkildə cəzanın icrası uşağı 14 yaşına çatanadək təxirə salınmışdı. Lakin sonradan onun barəsində həbs qətimkan tədbiri seçilib.

Bəs bir vaxtlar uşaqlara işgəncə verməkdə təqsirləndirilən şəxs yenidən uşaq sığınacağının idarəçiliyinə necə qayıda bilər?

Mövzu ilə əlaqədar keçirilən sorğu zamanı paytaxt sakinləri bildiriblər ki, həmin şəxsin yenidən uşaqlara və digər həssas qruplara xidmət göstərən müəssisədə fəaliyyət göstərməsi düzgün deyil.

Qanunvericiliyə əsasən, dövlət və bələdiyyə tərəfindən yaradılan uşaq evləri müvafiq əsasnamə əsasında fəaliyyət göstərir və onların fəaliyyətinə Sosial Xidmətlər Agentliyi tərəfindən nəzarət edilir. Özəl sığınacaqlar isə əsasən qeyri-hökumət təşkilatlarının nəzdində fəaliyyət göstərir və müvafiq akkreditasiyadan keçməlidir.

Hüquqşünas Vüsal Cəfərovun sözlərinə görə, məhkəmə tərəfindən şəxsin müəyyən vəzifə tutmaq və ya müəyyən fəaliyyətlə məşğul olmaq hüququndan məhrum edilməsi ayrıca cəza kimi təyin edilməyibsə, əvvəlki məhkumluq avtomatik olaraq onun müəyyən fəaliyyətlə məşğul olmasına maneə yaratmaya bilər.

Bununla belə, törədilmiş cinayətin xarakteri, ictimai təhlükəliliyi və şəxsin xüsusiyyətləri nəzərə alınaraq belə hüququn məhdudlaşdırılması mümkündür.