Çökmüş yol, dərin çuxurlar | Biləcəridə qəza riski yaradan yol - Baku TV

Binəqədi rayonu, Biləcəri qəsəbəsi, 10 may və Xırman küçələrinin kəsişməsində yolun vəziyyəti sakinlərin narazılığına səbəb olub.

Onların sözlərinə görə, küçənin giriş hissəsində asfalt örtüyü tamamilə dağılıb, kanalizasiya quyusunun ətrafında isə çökmələr yaranıb. Bu səbəbdən avtomobillərə mütəmadi olaraq ziyan dəyir.

Baku TV-nin qaynar xəttinə daxil olan şikayət əsasında əraziyə baxış keçirilib.

Sakinlər bildirirlər ki, yaranmış çuxurlar səbəbindən hər gün bir neçə avtomobil müxtəlif nasazlıqlarla üzləşir. Belə ki, bəzi nəqliyyat vasitələrinin diskləri əyilir, təkərləri partlayır, asqı sisteminə ziyan dəyir.

Problemin gecə saatlarında daha da təhlükəli olduğu qeyd olunur. Küçənin işıqlandırmasının zəif olması səbəbindən sürücülər çuxurları vaxtında görə bilmir. Bəzi sürücülər çuxurlardan yayınmaq üçün qarşı zolağa çıxır ki, bu da tıxac və qəza riskini artırır.

Sakinlərin sözlərinə görə, yolun bu vəziyyətə düşməsinin əsas səbəblərindən biri iritonnajlı yük avtomobillərinin həmin küçədən istifadə etməsidir.

Onlar məsələ ilə bağlı dəfələrlə aidiyyəti qurumlara müraciət etsələr də, problem hələ də həll olunmayıb.