“Çox gözlədim, dedilər ki, qaytarılıb, amma...” - Karqo şirkəti bağlamanı təhvil vermir - Baku TV

Son zamanlar onlayn alış-veriş platformalarından istifadənin sayı artıb. Bunun fonunda karqo şirkətləri ilə bağlı problemlər də qabarıb.

Bir çoxları sosial şəbəkələrdə məhsulların gec və ya defektli vəziyyətdə gəlməsindən şikayətlənirlər. Hətta elə karqo şirkətləri var ki, sifariş olunan və geri qaytarılan malları mənimsəməkdə ittiham olunur.

İddialara görə, bu cür hallara daha çox “Temu”dan sifariş olunan malların çatdırılmasında rast gəlinir.

Şikayətçi Tofiqə Qurbanova da bununla bağlı başına gələnləri Baku TV-yə danışıb.

Tofiqə Qurbanova “Temu”dan məhsul sifariş verib. Daha sonra məhsulun çatdırılması gecikdiyi üçün sifarişi ləğv etmək məqsədilə platformaya müraciət edib. Vətəndaşa ödəniş məbləği qaytarılıb və ona məhsulun geri göndərilməsinə ehtiyac olmadığı bildirilib.

Bundan sonra o, bağlamanı təhvil almaq məqsədilə “166 Cargo” şirkəti ilə əlaqə yaradıb. Onlar sifarişi götürmək üçün vətəndaşı “Kargolux”a yönləndiriblər. Şirkət əməkdaşları isə bağlamanın gömrük orqanına təhvil verildiyini deyiblər.

Mövcud vəziyyətlə bağlı adıçəkilən karqo şirkətindən verilən məlumata görə, onlara bildirilib ki, həmin məhsul gömrükə təhvil verilməlidir.

Dövlət Gömrük Xidmətindən isə qeyd edilib ki, bağlama gömrük nəzarətindən keçib və daşıyıcı şirkətə təhvil verilib. Daha sonra gömrük tərəfinə qaytarılması tələb olunmayıb.

Şikayətçi isə əlaqə saxlayaraq bağlamasının ona təhvil verildiyini bildirib.