Çox sevilən iş adamının bilinməyən həyatı | Ofisiantlıqdan başladı, hamının tanıdığı şəxsə çevrildi

“Arzunun vaxtı” verilişinin yeni buraxılışında iş adamı Xanlar Kərimov öz həyat hekayəsindən söz açıb.

Uşaqlıqdan zəhmətə qatlanmağı özünə borc bilən Xanlar bəy keçdiyi çətin yollardan bəhs edib:

“Beş uşağın böyüyü olmuşam. Ailəmə yük olmamaq üçün uşaqlıqda müxtəlif işlərdə çalışmışam – çaydan daş yığmışam, meşədən odun gətirmişəm, su satmışam. Həyatın hər çətinliyini görmüşəm”.

O, uğurlu fəaliyyətinə 1983-cü ildə ofisiantlıqla başladığını deyib:

“Həmişə qonaqpərvər olmuşam. Ofisiant işləyəndə insanları duymağı, hiss etməyi öyrəndim. 1991-ci ildə Qəbələdə sadə bir çadırla işə başladıq. Zamanla qonaqlar buranı “Xanlar” adlandırmağa başladılar. Maddiyyatı yox, həmişə qonağın məmnuniyyətini və təmizliyi ön planda tutmuşam”.

Çətin dövrlərində yerli gənclərə dayaq olduğunu vurğulayan Xanlar bəy kollektivinə olan sevgisini belə ifadə edib:

“Çətin vaxtlarda Qəbələ gənclərini başıma yığıb onlara peşə öyrətdim. Bakıda, Moskvada işlə təmin etdim, təhsil almalarına dəstək oldum. Mən bu gün işimlə, Qəbələmlə və azərbaycanlı olmağımla fəxr edirəm”.