“Crescent Mall” sakinlərin istifadəsinə verildi

Bakıda daha bir ticarət mərkəzi – “Crescent Mall” sakinlərin istifadəsinə verilib.

Ticarət mərkəzində ölkənin mədəni irsini özündə əks etdirən milli elementlərdən ibarət incəsənət nümunəsi ziyarətçilər tərəfindən maraqla qarşılanır. “Həyat Ağacı” ənənələrimizə sadiq qalaraq gələcəyə doğru sürətlə inkişaf edən birlik və azadlığı əsas meyarı seçən Azərbaycan xalqını simvolizə edir.

115 min kvadratmetr sahədə alış-veriş, əyləncə və istirahətin təklif edildiyi məkanda 5 mərtəbəli müasir texnologiyalarla inşa edilən bina, 3 mərtəbəli 1193 parkinq yeri, açıq havada yerləşən terras və restoran, həmçinin Azərbaycanda ilk dəfə fəaliyyət göstərəcək musiqili fontan yer alıb.

SPA, gözəllik və fitness mərkəzləri də qonaqların xidmətindədir. Rəqəmsallaşan dünyanın yeni trendlərinə uyğun olaraq süni intellektlə fəaliyyət göstərən məlumat bələdçisi də var.

“Crescent Mall” ticarət mərkəzi kimi obyektlərin istifadəyə verilməsi ölkəmizin iqtisadi potensialını və vətəndaşlara xidmətin yüksək səviyyədə təşkilini nümayiş etdirir.