“Dedi, bilmirik, başlarına nə gəlib” | Dostu ilə eyni anda şəhid olan Əbdülməcid Axundov - Baku TV

Aprel döyüşləri şəhidi Əbdülməcid Axundovun anası Ceyran Həsənova Baku TV-yə müsahibəsində oğlunun şəhadətə gedən son anlarından danışıb.

O bildirib ki, Aprel döyüşləri başlayan günlərdə Əbdülməcid qardaşı Elçini ad günü münasibətilə telefonla təbrik edib və bu, onun ailəsi ilə son danışığı olub.

Bundan sonra onunla əlaqə kəsilib. Ana günlərlə Əbdülməciddən xəbər gözləyib, lakin şəhid olduğu xəbəri bir müddət ondan gizlədilib.

Ceyran Həsənovanın sözlərinə görə, şəhadət xəbəri ona aprelin 8-də çatdırılıb.

“Əbdülməcidin nəşi silahdaşı və universitet yoldaşı Elvin Mirzəyevlə birlikdə tapılıb. Hadisə yerində təsirli mənzərə ilə qarşılaşıblar. O, Elvin Mirzəyevin topuğundan tutmuş vəziyyətdə olub. İlk ehtimala görə, Elvin Mirzəyev daha əvvəl şəhid olub, Əbdülməcid isə dostunu xilas etməyə çalışarkən son nəfəsini verib”, – deyə o qeyd edib.

Şəhid anası Əbdülməcidin ən böyük arzusunun Qarabağ uğrunda döyüşmək olduğunu söyləyib.

“O, çox vətənpərvər oğlan idi. Əbdülməcid kimi oğullar təəssüf ki, çox qısa ömür yaşadılar. Amma Azərbaycanın Zəfər tarixinə öz imzalarını yazmağı bacardılar”, – deyə C.Həsənova vurğulayıb.