Dələduzların yeni taktikası

Sosial şəbəkələrdə yalançı iş elanları yayaraq dələduzluq edənlər yeni metoda əl atıblar.

Belə ki, saxta xarici nömrələrdən vətəndaşlara iş təklifləri ilə bağlı həvəsləndirici mesajlar göndərir, rüsum adı ilə onlardan müəyyən məbləğdə pul alaraq mənimsəyirlər. Hüquq-mühafizə orqanları məsələ ilə bağlı araşdırmalara başlayıb.

“Onlar elan saytları vasitəsilə yüksək maaşla iş təklif edirlər. İşlə bağlı onlara müraciət edənlərdən də müəyyən məbləğdə rüsum istəyirlər. Daha sonra isə həmin şəxslərlə əlaqə saxlamaq mümkün olmur. Həmin şəxslər adətən vətəndaşlara xüsusilə saxta xarici nömrələrdən zənglər edir və yazışmanı vatsap vasitəsilə aparırlar. Bu kimi neqativ halların qarşısını almaq məqsədilə polis əməkdaşları tərəfindən daxil olmuş məlumat əsasında əməliyyat-axtarış tədbirləri görülməklə hal araşdırılır və qanunamüvafiq şəkildə təmin olunur”, - deyə Daxili İşlər Nazirliyindən qeyd edilib.

DİN bu kimi dələduzluq halları ilə üzləşən şəxslərə polisə müraciət etməyi, həmçinin vətəndaşlara tanımadıqları şəxslərə, etibar etmədikləri şirkətlərə onlayn qaydada pul köçürməməyi tövsiyə edir.