DİM-dən taksi sürücüləri ilə bağlı vacib məlumat | İmtahanda iştirak üçün...

1 iyul 2024-cü il tarixindən sonra xüsusi hazırlıq keçmiş taksi sürücüləri üçün imtahan gününün vaxtı açıqlanıb.

Dövlət İmtahan Mərkəzindən verilən məlumata görə, ilk imtahan günü avqustun 25-nə təyin olunub.

Taki sürücülərindən bəziləri imtahan gününü öyrəndikdən sonra iştirak edib şəhadətnaməni almaq istədiklərini bildiriblər.

Qeyd edək ki, imtahanda iştirak etmək üçün Mərkəzə müvafiq qurumlar tərəfindən 1800 nəfərə yaxın şəxsin məlumatları təqdim olunub.

Məlumatda bildirilib ki, imtahanda iştirak etmək istəyən həmin sürücülər ilk növbədə DİM-in internet saytında “Şəxsi kabinet” yaratmalı və 6 avqust saat 15:00-dan 20 avqust saat 23:59-dək qeydiyyatdan keçməlidirlər. Sürücülər həmçinin “Şəxsi kabinet” yaratdıqdan sonra həmin kabinetin pul hesabına imtahanda iştirak etmək üçün tələb olunan 35 AZN məbləğində vəsaiti əlavə etməlidirlər.

İmtahan zamanı namizədlərə sürücülərin etik davranışı və avtomobil nəqliyyatı ilə sərnişin daşımalarını tənzimləyən normativ hüquqi aktlara dair 20 test tapşırığı təqdim ediləcək. Hər tapşırığın düzgün cavabı 1 balla qiymətləndirildiyi halda səhv cavablar isə düzgün cavabların nəticəsinə təsir göstərməyəcək. 10 və daha çox bal toplamış şəxslər imtahanı müvəffəqiyyətlə vermiş sayılaraq onlara 7 il müddətində etibarlı olan şəhadətnamə təqdim ediləcək.