DİM-dən yeniyetmələr üçün yenilik

“Müşahidələrimiz göstərir ki, ixtisas seçimi çox erkən yaşda aparılanda, uşaqlar kimlərinsə təsiri altına düşür. Çox zaman valideynlərin təzyiqi altında sevmədikləri ixtisası seçir və yaxşı karyera qura bilmirlər”.

Bunu Dövlət İmtahan Mərkəzinin Direktorlar Şurasının sədri Məleykə Abbaszadə "Gələcəyə hazır ol!" Karyera İnkişaf Forumunda deyib.

O bildirib ki, DİM son 3 ildə bu istiqamətdə xüsusi bir metodika hazırlayıb: "Bu metodika erkən yaşda şəxsin hansı istiqamətdə təhsil alarsa, uğurlu karyera quracağını müəyyənləşdirməyə imkan verir. Bunun üçün sorğular toplanıb və bir neçə nazirliklə 15-17 yaşlı yeniyetmələr arasında bu metodikanın tətbiqinə başlanılıb. Təbii ki, bu üsulla sadəcə məsləhət verə bilərik. Lakin bununla uşaqlara gələcək karyeralarını yaxşı qurmaları üçün düzgün istiqamət vermək olar".