Dövlət bağçalarında özbaşınalıq? | Valideynlər növbədə qalıb, uşaqlar evdə!

Son vaxtlar valideynlərin üzləşdiyi problemlərdən biri də dövlət bağçalarına qeydiyyatla bağlı yaranan çətinliklərdir.

Bəziləri asanlıqla qeydiyyatdan keçə bilsə də, övladını bağçaya yazdırmaq istəyən elə valideyn var ki, günlərlə, hətta aylarla növbədə gözləməli olur.

Bəs dövlət bağçalarında bu qədər sıranın yaranmasının səbəbi nədir?

Baku TV mövzu ilə bağlı sakinlərin fikirlərini öyrənib.

“Pul istəyirlər. Verməyəndə deyirlər ki, heç gətirmə, yer yoxdur”, – sakinlərdən biri bildirib.

Başqa bir sakin isə belə deyib:

“Biz övladımızı bağçaya qoyanda da belə problem var idi. “Yer çatışmazlığı var. Tez növbəyə düşsəniz, qəbul ola bilərsiniz” deyirdilər”.

Mövzu ilə bağlı Məktəbəqədər və Ümumi Təhsil üzrə Dövlət Agentliyindən isə bildirilib ki, hazırda ölkəmizdə bağça yaşlı uşaqların məktəbəqədər təhsilə cəlb olunma göstəricisi 38 % təşkil edir. Ölkə ərazisində 1669 dövlət, 177 özəl məktəbəqədər təhsil müəssisəsi fəaliyyət göstərir. Paytaxtda əhalinin məskunlaşma səviyyəsi yüksək olduğundan bağçalara qəbul zamanı müəyyən sıxlıq müşahidə olunur. Bunu aradan qaldırmaq üçün alternativ təhsil modellərindən uğurla istifadə edilir.

Qurumdan o da bildirilib ki, alternativ modellərlə yanaşı, bağça infrastrukturunun genişləndirilməsi də diqqət mərkəzində saxlanılır. Növbəlilik prinsipi əsasında məktəbəqədər təhsil müəssisələri inşa edilir.