Dövlət qulluqçularına verilən mükafat və əlavələr ləğv olunaraq əməkhaqlarına daxil edildi - Baku TV

Prezident İlham Əliyev tərəfindən imzalanan yeni qanunvericilik aktları dövlət idarəçiliyində aparılan institusional islahatları davam etdirməyə, o cümlədən dövlət qulluğunda əməkhaqqı sisteminin daha müasir, təkmil şəkildə qurulmasına imkan yaradır.

Bununla da islahatlar dövlət qulluğunda əməkhaqqı sisteminin daha şəffaf, ədalətli və nəticəyönümlü olmasına xidmət edir.

Yeni model dövlət qulluğunda əvvəllər müxtəlif əlavələr formasında ödənilən hissələrin vəzifə maaşının tərkibinə daxil edilməsi ilə əməkhaqqının vahid strukturunun müəyyən edilməsinə, daha aydın, sabit, ədalətli olmasına imkan yaradır.

Söhbət ondan gedir ki, bütün mükafat və əlavələr ləğv edilərək maaşa daxil ediləcək və əməkhaqqının baza hissəsi artırılacaq. Nəticədə, əvvəl əməkhaqqının baza hissəsi 35–45 faiz idi, indi bu göstərici 95 faizdən yuxarı təşkil edəcək.

Qeyd edək ki, əvvəlki modeldə əməkhaqqının əhəmiyyətli hissəsi müxtəlif əlavələrdən formalaşdığı üçün gənc və yeni dövlət qulluğuna qəbul olunan əməkdaşların məvacibi nisbətən aşağı olurdu. Bu isə özəl sektorun daha cəlbedici imkanlar təqdim etməsi nəzərə alınmaqla müasir əmək bazarının şərtləri ilə tam uyğunlaşmırdı.

Digər tərəfdən əməkhaqqının vahid strukturu bir sıra hallarda özünü göstərən maaş disproporsiyalarının aradan qalxmasını, bərabər imkanların təmin edilməsini şərtləndirmiş olacaq. Bu baxımdan yeni islahat tədbiri sabit və rəqabətqabiliyyətli əməkhaqqı sisteminə şərait yaratmaqla dövlət qulluğunun da əmək bazarında rəqabət qabiliyyətini artırır.

Eyni zamanda dövlət qulluqçularının əməkhaqqının daha stabil və proqnozlaşdırılan olması təmin ediləcək. Nəticədə, dövlət qulluğu sahəsində yeni əməkhaqqı modelinə keçid bu sahəyə peşəkar mütəxəssislərin, habelə gənc və istedadlı kadrların cəlb olunmasının stimullaşdırılmasına, eyni zamanda dövlət qulluqçularının sosial müdafiəsinin gücləndirilməsinə imkan yaradır.