Dövlət qurumları qışa hazırdır? - Leysan, “iflic” olan yollar, qazsız qalan evlər... - Baku TV

Şaxtalı hava, qar, leysan yağışlar və bunun fonunda donmuş su sayğacları, qazsız qalan evlər, işıq kəsintiləri, qar səbəbindən yollarda saatlarla hərəkətsiz qalan avtomobillər və qaçılmaz qəzalar.

Hər il qış mövsümündə demək olar ki, eyni mənzərə təkrarlanır. Xüsusilə yanvarın ilk günlərində qaz təchizatında yaşanan problemlər onlarla vətəndaşın narazılığına səbəb olmuşdu. Bu isə bir sualı yenidən gündəmə gətirir.

Dövlət qurumları qışa, doğrudanmı, hazırdır, yoxsa hazırlıq kağız üzərində qalır?

Məsələ ilə bağlı İri Şəhərlərin Birləşmiş Su Təchizatı Xidmətindən bildirilib ki, qış aylarında kanalizasiya və yağış sularının ötürülməsi üçün kollektorlar yuyulur, baxış quyuları və yağış barmaqlıqları təmizlənir, nasos stansiyaları təftiş olunur.

Qurum eyni zamanda xəbərdarlıq edir ki, qış aylarında problemlər əsasən donvurma səbəbindən yaranır və bu, xüsusilə izolyasiya olunmayan su xətləri və açıq havada quraşdırılmış sayğaclarla bağlıdır. Vətəndaşlara sayğacların qorunması üçün qabaqlayıcı tədbirlər görmək tövsiyə olunur.

Azərbaycan Avtomobil Yolları Dövlət Agentliyi isə dağlıq və dağətəyi ərazilərdə qarla mübarizə tədbirlərinin davam etdiyini bildirib:

“Bütün texnika hazır vəziyyətdə saxlanılır, duz-qum qarışığı səpilərək yolların buzlaşmasının qarşısı alınır”.

Bakı Şəhər Mənzil-Kommunal Təsərrüfatı Departamentinin məlumatına görə isə paytaxt rayonlarında qışa hazırlıqla bağlı qərargahlar yaradılıb, xüsusi texnikalar yoxlanılıb və kifayət qədər duz ehtiyatı formalaşdırılıb. Qar yağan zaman yalnız kommunal qurumların deyil, idarə və təşkilatların, bələdiyyələrin və özəl sektorun texnikalarının da prosesə cəlb olunması nəzərdə tutulur.