Dövlət qurumunun saytında müəmmalı nöqsanlar | ADY məsələ barədə nə dedi?

Uzun illərdir fəaliyyət göstərən “Azərbaycan Dəmir Yolları” QSC-nin saytında ciddi xətalar var.

Belə ki, saytdan hərbi bilet və ya doğum haqqında şəhadətnamə ilə bilet almaq istəyən sərnişindən sənədin son etibarlılıq tarixi istənilir. Halbuki bu sənədlərin etibarlılıq müddəti olmur.

Məsələ ilə bağlı İKT mütəxəssisi Əmrah Mövsümzadə bildirib ki, sözügedən qurumun saytını ərsəyə gətirən şəxslər bilet alışı hissəsindəki xanaları şəxsiyyət vəsiqəsinin etibarlılıq müddətini əsas götürərək proqramlaşdırıblar:

“Əlavə olaraq qeyd edim ki, 65 yaşdan yuxarı şəxslərin şəxsiyyət vəsiqələrinin son etibarlılıq tarixinin olmamasını nəzərə alsaq, bu yaş dövrünə aid olan şəxslərin də vəsiqələrinin son etibarlılıq tarixini tələb etmək doğru deyil”.

“Azərbaycan Dəmir Yolları” QSC-dən isə bildirilib ki, hazırda qurumun korporativ saytı yenilənir və yaxın günlərdə istifadəyə veriləcək.