Dünyamin Xəlilov yenidən məhkəmədə | Milyonlarla pul mənimsəyən keçmiş deputat

“Azərbaycan Beynəlxalq Bankı” Açıq Səhmdar Cəmiyyətinin keçmiş vəzifəli şəxsləri ilə əlbir olaraq cinayət törətməkdə ittiham olunan sabiq deputat Dünyamin Xəlilov və onun tanışı Azad Cavadovun işi ilə bağlı növbəti məhkəmə prosesi keçirilib.

Bakı Ağır Cinayətlər Məhkəməsinin hakimi Əli Məmmədovun sədrliyi ilə baş tutan prosesdə ittiham aktında göstərilən müəyyən epizodlara aydınlıq gətirilib. Bununla yanaşı, müdafiə tərəfi məhkəməyə əlavə sənədlər təqdim etməklə çıxış üçün vaxt istəyib. Bunu nəzərə alan hakim növbəti prossesi dekabrın 22-nə təyin edib.

Qeyd edək ki, ittiham aktına görə, Dünyamin Xəlilov və Azad Cavadovun 2001-2015-ci illər ərzində “Azərbaycan Beynəlxalq Bankı” Açıq Səhmdar Cəmiyyətinin sabiq rəhbər vəzifəli şəxsləri ilə birgə cinayətkar qrup yaradaraq, rəhbərlik etdikləri “Bakı Fındıq Emalı Müəssisəsi” Məhdud Məsuliyyətli Cəmiyyətinin işçilərinə kreditlərin rəsmiləşdirilməsinə dair bankın vəzifəli şəxsinin verdiyi qanunsuz göstərişləri icra edib və həmin şəxsləri bankın müxtəlif filiallarına göndərməklə adlarına rəsmiləşdirilmiş ümumilikdə 6 milyon 642 min manatdan çox məbləğdə pul vəsaitini mənimsəmələrinə əsaslı şübhələr müəyyən edilib.

İş üzrə toplanmış sübutlar əsasında Dünyamin Xəlilov və Azad Cavadova Cinayət Məcəlləsinin 179.3.1 və 179.3.2-ci (mütəşəkkil dəstə tərəfindən və külli miqdarda mənimsəmə) maddələri ilə ittiham elan edilib.