Prokuror sabiq deputata iş istədi

“Azərbaycan Beynəlxalq Bankı” Açıq Səhmdar Cəmiyyətinin vəzifəli şəxsləri ilə əlbir olaraq cinayət törətməkdə ittiham olunan sabiq deputat Dünyamin Xəlilov və Azad Cavadovun cinayət işinin məhkəmə istintaqı başa çatıb.

Bakı Ağır Cinayətlər Məhkəməsinin hakimi Əli Məmmədovun sədrliyi ilə baş tutan prossesdə prokuror Eldar Həmzə Dünyamin Xəlilovun 15 il, Azad Cavadovun isə 13 il 6 ay müddətinə azadlıqdan məhrum edilməsini istəyib.

Qeyd edək ki, ittiham aktına görə, Dünyamin Xəlilov və Azad Cavadov 2001-2015-ci illərdə “Azərbaycan Beynəlxalq Bankı” Açıq Səhmdar Cəmiyyətinin sabiq rəhbər vəzifəli şəxsləri ilə birgə sabit cinayətkar qrup yaradıblar. Onlar rəhbərlik etdikləri “Bakı Fındıq Emalı Müəssisəsi” məhdud məsuliyyətli cəmiyyətin işçilərinə kreditlərin rəsmiləşdirilməsinə dair bankın vəzifəli şəxsinin verdiyi qanunsuz göstərişləri icra ediblər. Həmin şəxsləri bankın müxtəlif filiallarına göndərməklə adlarına rəsmiləşdirilən ümumilikdə 6 milyon 642 min manatdan artıq məbləğdə pul vəsaitini mənimsəyiblər.

İş üzrə toplanan sübutlar əsasında Dünyamin Xəlilov və Azad Cavadova Cinayət Məcəlləsinin mütəşəkkil dəstə tərəfindən və külli miqdarda mənimsəmə maddələri ilə ittiham elan edilib.