Düşmənin qorxulu röyasına çevrilən silahlı birləşmə

Bu gün Azərbaycan Xüsusi Təyinatlı Qüvvələrinin yaradılmasından 24 il ötür.

1999-cu il aprelin 30-da yaradılan bu silahlı birləşmənin formalaşmasında Birinci Qarabağ müharibəsi iştirakçısı olan zabit və gizirlər iştirak ediblər. Onların inkişafında Türkiyə Silahlı Qüvvələrinin Xüsusi Təyinatlı Qüvvələri də müstəsna rol oynayıb.

Bundan başqa, Azərbaycan xüsusi təyinatlıları müxtəlif ölkələrin təlim mərkəzlərində keçirilən kurslarda iştirak edib və dəfələrlə ABŞ, Türkiyə və Pakistandakı yarışlarda yüksək nailiyyətlər qazanıblar. 2016-cı ilin aprelində baş verən döyüşlərdə Silahlı Qüvvələrimizin bu elit bölmələri iştirak ediblər. Döyüşlər zamanı düşmənin çoxsaylı canlı qüvvəsi və hərbi texnikası məhv edilib.

2020-ci il sentyabrın 27-də başlayan Vətən müharibəsində də Xüsusi Təyinatlı Qüvvələr böyük şücaət göstərib. Düşmənin qorxulu röyasına çevrilən bu silahlı birləşmənin torpaqlarımızın düşmən tapdağından azad edilməsində misilsiz xidmətləri olub. Onların qayalara dırmaşaraq Şuşaya daxil olmaları, şəhəri inanılmaz qəhrəmanlıqla işğaldan azad etməsi dünya hərb tarixinə düşüb.

Azərbaycan Xüsusi Təyinatlı Qüvvələri dünya müdafiə sənayesinin aparıcı şirkətlərinin istehsalı olan müasir silahlar, döyüş vasitələri və texnikalara malikdir.

Qeyd edək ki, Xüsusi Təyinatlı Qüvvələrin komandanı general-leytenant, Vətən Müharibəsi Qəhrəmanı Hikmət Mirzəyevdir.