Əhali əlavə gəliri hara yatırım edir? | Ən sərfəli sərmayə imkanları açıqlandı

İndi əksər insanlar əlavə gəlir qazanmaq üçün əllərindən gələni edirlər.

Müəyyən qədər vəsaiti olan şəxslər hansısa sahələrə yatırım edərək əlavə qazanc əldə edirlər.

Maraqlıdır, bəs sadə vətəndaş nə etməlidir? Onlar ciblərinə uyğun hansı sahələrə sərmayə qoyub daha çox qazanc əldə edə bilərlər?

İqtisadçı Xalid Kərimli deyir ki, vətəndaşın vəsaiti çoxdursa, onu bir neçə bank arasında bölə bilər:

“İkincisi, vətəndaşlar daha az riskli hesab olunan və son illərdə sürətlə qiymətləri artan əmlak sektorundan da faydalana bilərlər. Bilirik ki, əmlakın investisiyaları 3 kateqoriyaya bölünür. Bu, torpaq, yaşayış və qeyri-yaşayış sahələrinin investisiyalarıdır. Burada da gəlirlilik dərəcəsi yüksək olmasa da, adətən 4-5 faiz illik gəlirlilik norması olur”.

Xalid Kərimli həmçinin bildirib ki, gəlir əldə etmək üçün qızıla da yatırım etmək olar.

Hazırda qeyd edilən sərmayə imkanlarından ən sərfəlisi isə banka əmanət yerləşdirmək hesab olunur. Ekspertlərin sözlərinə görə, milli valyutada illik 12 faizədək əmanət imkanları ilə yanaşı, inflyasiyanın aşağı səviyyədə olması banka pul qoymağı daha əlverişli edir.