Ekspertdən dərman qəbul edənlərə mühüm tövsiyə

Rusiyalı mütəxəssis Natalya Kalaşnikovanın sözlərinə görə, çayın tərkibində ona acıtəhər dad verən taninlər var. Onlar dərmanın təsiredici maddələri ilə qarşılaşdıqda kimyəvi reaksiyaya girərək bir-birinə bağlanır və həll olunmayan komplekslər əmələ gətirir.

Nəticədə bağırsaq divarından keçə bilməyən iri molekullar yaranır. Beləliklə, preparat orqanizm tərəfindən sorulmadan həzm sistemindən keçib gedir və heç bir müalicəvi təsir göstərmir", – deyə o bildirib.

Kalaşnikovanın sözlərinə görə, ikinci problem isə çayın tərkibindəki kofeindir. Kofein bəzi hallarda gözlənilməz təsir göstərən güclü stimullaşdırıcıdır.

O, qaraciyər fermentlərinin fəaliyyətinə təsir edir. Nəticədə bəzi dərmanların qandakı konsentrasiyası artır. Bu isə əks-təsirlərin riskini artırır və ya əksinə, preparatın müalicəvi təsirini tamamilə zəiflədir.

Ekspert vurğulayıb ki, ən düzgün və universal qayda dərmanları adi su ilə qəbul etmək, çay və qəhvəni isə ayrıca içməkdir.

Onun sözlərinə görə, dərmanların əksəriyyəti üçün çay və ya qəhvə ilə qəbul arasında 30-60 dəqiqəlik fasilə kifayət edir. Lakin bəzi preparatlar, xüsusən də dəmir preparatları və müəyyən antibiotiklər qəbul edilərkən bu interval daha uzun – ən azı iki saat olmalıdır.