Emin Ağalarov Crocus-da gördüyü hər şeyi danışdı | Qaçmaq fikrim yoxdur!

“Heç yerə qaçmaq fikrim yoxdur”.

“Crocus Group” şirkətinin 1-ci vitse-prezidenti Emin Ağalarov konsert zalında baş verən terror aktından sonra Rusiyadan getməsi ilə bağlı çıxan xəbərlərə reaksiya verərək belə deyib.

O, “Forbes” jurnalına müsahibəsi zamanı həmçinin hadisədən necə xəbər tutmasından və faciə yerində gördüklərindən də danışıb:

“Zalın direktoru Roman Qraçov mənə zəng etdi və “Crocus”da atışma olduğunu dedi. Həmin vaxt mən Kutuzovskidə yerləşən ofisimdə idim. Maşına mindim və 30-45 dəqiqə sonra hadisə yerinə çatdım.

Mən çatanda artıq binada yanğın başlamışdı və insanların çoxu qaçıb getmişdi. Bu, çox dəhşətli bir mənzərə idi, küçədə ölülər var idi. Biz zalın direktoru ilə birgə məkanda sağ qalanların olub-olmamasını yoxladıq. Təəssüf ki, onlar arasında həyatda olan yox idi. Mən əraziyə cəlb olunan əməkdaşlara insanların təxliyəsi üçün kömək edirdim. Amma həqiqətən də heç filmlərdə də mən bu qədər insan ölüsünü bir yerdə görməmişdim.

Təxliyə məsələsinə gəldikdə isə həmin vaxt sistem düzgün işləyib, çünki tamaşaçıların 98%-i qaçmağı bacarıb. Lakin görüntülərdə əks olunan problemlər insanların təşvişə düşməsi ilə bağlı olub. Onlar qorxduqları üçün texniki otaqlara qaçaraq canlarını qurtarmağa çalışıblar”.

Azərbaycanın Xalq artisti müsahibəsində sözügedən terror aktına görə son günlərdə çox stresli olduğunu da vurğulayıb.