Emin Əmrullayev məktəblərdə süni intellektin tətbiqindən danışdı - Baku TV

Şagirdlərin süni intellektdən necə istifadə etməsi onların öyrənmə nəticələrinə birbaşa təsir edir.

Bunu elm və təhsil naziri Emin Əmrullayev yeni tədris ilinə dair keçirilən mətbuat konfransında deyib.

Onun sözlərinə görə, şagirdlər süni intellektdən, sadəcə, sualın cavabını tapmaq üçün deyil, həll prosesini başa düşmək və öyrənmək məqsədilə istifadə etdikdə bunun faydası daha çox olur:

"Əgər sadəcə olaraq sualın cavabını axtarırlarsa, həmin şagirdlər daha aşağı nəticə göstərirlər. Süni intellektin onları daha bacarıqlı etməsinə gətirib çıxarmır".

E.Əmrullayev qeyd edib ki, süni intellektdən düzgün istifadə edildikdə yaxşı müəllim daha da yaxşı nəticə göstərə bilər:

"Bu, alətdir və düzgün istifadə olunursa, çox güclüdür. Amma səhv istifadə olunursa, istənilən alət kimidir".

Nazir bildirib ki, Elm və Təhsil Nazirliyi növbəti tədris ilində süni intellektlə bağlı işlərini genişləndirəcək:

"Bunu necə etməyimiz, hansı çərçivədə həyata keçirməyimiz və hansı şəkildə tənzimləməyimiz daha ciddi ictimai müzakirə tələb edir".