Ən hündür heykəllərdən olacaqdı, ən bəxtsizi oldu | Babəkin abidəsi niyə ucaldılmır?

Qəfqazın ən hündür heykəllərindən biri olacağı deyilən xəlq qəhrəmanı Babəkin abidəsi hələ də tamamlanmayıb.

Bu barədə Baku TV-nin mövzu ilə bağlı hazırladığı süjetdə məlumat verilib.

Qeyd olunub ki, 2011-ci ildə Prezident İlham Əliyevin Sərəncamı ilə Babək prospektində ucaldılması nəzərdə tutulan heykəlin 2020-ci ildə təhvil verilməsi planlaşdırılırdı. Lakin heykəl üçün ayrılmış yerdə onun postamentindən başqa heç nə yoxdur.

Babəkin heykəlinin hazırkı vəziyyəti ilə bağlı sərəncamdan irəli gələn məsələlərin icrası tapşırılan Bakı Şəhər İcra Hakimiyyətinə sorğu ünvanlansa da, cavabsız qalıb.

Xalq rəssamı, heykəltəraş Xanlar Əhmədov abidənin hansı səbəbdən bu günə kimi hazır olmadığını belə izah edib:

“Arif müəllim bu heykəli 10 metr hündürlükdə hazırlamalı idi. Amma iş belə gətirdi ki, maliyyə məsələləri çətinləşdi. Arif müəllimin 10 metrlik heykəlinin tam gips modeli hazır idi. Amma bunu tunca köçürmək məsələsinə maliyyə çatışmazlığı mane oldu”.

Qeyd edək ki, abidənin bürüncdən tökülməsi prosesi Rəssamlar İttifaqının nəzdində İstehsalat Yaradıcılıq Kombinatında aparılır. Adıçəkilən qurumda prosesin yarı hissəsi artıq başa çatıb. Heykəlin özü yarımçıq qalsa da, maketi demək olar ki, hazırdır.