“Ərəblərin etdiyi cəzasız qalmasın!” - Şəhidlər xiyabanındakı qalmaqallı video gündəmi silkələdi

Şəhidlər xiyabanında qeyri-etik videolar çəkən turistlərin görüntüləri sosial mediada geniş müzakirələrə səbəb olub.

Onlar barəsində hüquq-mühafizə orqanları lazımi tədbirlər görsə də, bu cür hallar yalnız ictimai narazılığa yol açmır, həm də ölkəmizin milli-mənəvi dəyərlərinə hörmətsizlik hesab olunur.

Məsələ ilə bağlı Baku TV paytaxt sakinlərinin mövqeyini öyrənib. Onlardan biri bildirib:

“Ərəb vətəndaşları etdikləri hərəkətə görə cəzalanmalıdırlar. Onlar şəhidlərin ruhuna hörmətsizlik ediblər və bu, cəzasız qalmamalıdır”.

Qəbuledilməz görüntülərlə bağlı Dövlət Turizm Agentliyindən bildirilib ki, hazırda məsələ ilə bağlı hüquq-mühafizə orqanları tərəfindən araşdırma aparılır:

“Dövlət Turizm Agentliyi tərəfindən mütəmadi olaraq maarifləndirici təlim və görüşlərdə turizm şirkətləri və turizm bələdçilərinə Azərbaycana gələn xarici vətəndaşlara turistik məlumatlarla yanaşı, ölkə haqqında vacib məqamlar, o cümlədən milli-mənəvi dəyərlər, yerli qanunvericilik və ictimai davranış qaydalarına hörmətlə yanaşılmalı məqamlar haqqında da ətraflı informasiya vermək tövsiyə olunur”.