Əsl narsist kimdir? | Sakinlər suala necə cavab verdi? - Baku TV

Hər addımbaşı cəmiyyətdə və sosial şəbəkələrdə “narsist” sözünə rast gəlirik. İnsanlar özünü üstün tutan, lovğalıq edən, daim diqqət gözləyən hər kəsi asanlıqla narsist adlandırırlar.

Bəs özünə güvənən hər şəxsi narsist adlandırmaq düzgündürmü?

Baku TV məsələ ilə bağlı paytaxt sakinlərinin fikirlərini öyrənib.

“Narsist insanlar ancaq özünü birinci görür. Qarşısındakı insanın fikri ona maraqlı deyil. Manipulyasiya edir”, – sakinlərdən biri deyib.

“Ən çox kişilərdə bunu eşitmişəm, amma qadınlarda da var. İnsan çox hörmət və sevgi görməyəndə artıq özünə söz verir ki, mən dəyişəcəyəm və insanlara ikinci dərəcəli baxacağam”, – başqa bir sakin bildirib.

Bəs əsl narsist kimdir?

Psixoloq Rəxşan Əli Əzimzadənin sözlərinə görə, narsisizmin əsas xüsusiyyətləri arasında tənqidə dözümsüzlük, empatiyanın zəif olması və bəzən insanlardan öz məqsədləri üçün sui-istifadə etmək yer alır:

“Amma burada çox vacib məsələ budur ki, özünə güvənən hər insan narsist deyil. Narsist başqasını əzən insandır. Sağlam özünə sevgi deyir ki, mən dəyərliyəm. Amma narsist birisi deyir ki, mən səndən daha dəyərliyəm və səni aşağı təbəqədə görür.

Psixologiyada biz davamlı davranış modelinə baxmalıyıq. Müəyyən narsistik xüsusiyyətlər hər bir insanda ola bilər. Təriflənməkdən xoşlanmaq, uğur qazandıqda fəxr etmək normaldır. Narsisizmdə isə bunlar həddindən artıq böyüdülür. Münasibətin əvvəlində belə insan çox cazibədar görünə bilər. Sizi çox xüsusi hiss etdirə, hətta idealizə edə bilər. Münasibət dərinləşdikcə isə diqqət və təsdiq ehtiyacı, tənqidə dözümsüzlük ortaya çıxır. “Başqası kimdir ki, o mənə bu sözləri desin?” düşüncəsi yarana bilər. Bununla yanaşı, empatiyanın zəifliyi, manipulyativ cümlələrdən istifadə, emosional təzyiq və nəzarət etmək istəyi də özünü göstərə bilər”.