Evlərimizi peyin iyi basıb! | Sahibkar sakinlərin şikayətinə nə cavab verdi?
Xəzər rayonu, Yeni Qala qəsəbəsi, Babək küçəsində yaşayan sakinlər ərazidə yerləşən fermadan şikayətçidirlər.
Vətəndaşları narahat edən məsələ tövlədə saxlanılan heyvanların qoxusu və havalandırma sisteminin səsidir.
Ərazidə yaşayan sakin narahatlığını Baku TV ilə bölüşüb: “Bura yaşayış sahəsidir. Ərazidə tövlə tikilib və içərisində iribuynuzlu, xırdabuynuzlu heyvanlar saxlanılır. Evində oturub pəncərəni açırsan, peyinin qoxusu evə dolur”.
“İçəridə çoxlu keçi var. Səhərlər qoxudan çölə çıxa bilmirik. Artıq bezmişik, nə qədər demək olar, heç kim bizə məhəl qoymur”, – deyə başqa bir sakin söyləyib.
Baku TV sakinləri narahat edən məsələ ilə əlaqədar ferma sahibi ilə əlaqə saxlayıb. O, vətəndaşların şikayətlərinə cavab olaraq havalandırma sisteminin artıq istifadə olunmayacağını söyləyib.
![icon](/images/loading.png)