Fazil Mustafaya qarşı terrorda yeni iddia

Millət vəkili Fazil Mustafaya qarşı həyata keçirilən silahlı hücumda saxlanılanlar arasında İlkin Süleymanov adlı şəxs də var.

Məlumata görə, bu şəxs İranın ölkəmizdəki casus şəbəkəsi ilə əlbir olub. Sosial media orqanlarından biri İlkin Süleymanovun əmisi Elnur Süleymanovla həmsöhbət olub.

Qardaşı oğlunun ümumiyyətlə siyasətdən kənar birisi olduğunu deyən E.Süleymanovun sözlərinə görə, İlkin sadə həyat tərzi sürürmüş. O, Xocəsən qəsəbəsində ət mağazasında işləyib. İ.Süleymanov DTX-nin keçirdiyi əməliyyatla elə həmin ət dükanının qarşısında saxlanılıb. Əmisinin dediklərinə inansaq, İlkin heç bir sübut və əsas olmadan saxlanılıb.

İlkin Süleymanov cinayət baş verən gün saat 20:14 radələrinədək işlədiyi mağaza ilə üzbəüz yerləşən kafedə yemək yeyib. Bu barədə görüntülər həmin kafenin təhlükəsizlik kameralarına da düşüb. Lakin saat 20:14-də kafeni tərk edən İlkinin sonradan hara getdiyi bilinmir.

Fazil Mustafaya qarşı silahlı hücum təxminən saat 21:50 radələrində həyata keçirilib. Yəni 1 saat 40 dəqiqəlik vaxt bir insanın Xocəsəndən Zabrat qəsəbəsinə yetişə bilməsi üçün kifayət qədər çox vaxtdır. Bundan başqa həmin kamera görüntülərindəki vaxtın reallığı əks etdirməsi də sual altındadır. Bütün bunlar isə saxlanılan şəxsin əmisi E.Süleymanovun dediklərini sual altında qoyur.