Fazil Mustafaya silahlı hücum edənlər niyyətlərini açıqladı

Milli Məclisin deputatı Fazil Mustafaya sui-qəsddə təqsirləndirilən Emin Əliyarov, Rəşad Əhmədov, Azər Səricanov, Elşad Əsgərov və Səbuhi Şirinovun cinayət işi üzrə məhkəmənin növbəti iclası keçirilib.

Bakı Ağır Cinayətlər Məhkəməsinin hakimi Elnur Nuriyevin sədrliyi ilə keçirilən prosesdə təqsirləndirilən şəxslərdən Rəşad Əhmədovun saxlanılmasında iştirak edən əməliyyatçılardan biri sonuncu şahid kimi ifadə verib.

O bildirib ki, Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinin əməkdaşıdır. Təqsirləndirilən Rəşad Əhmədovun psixotrop maddələrin dövriyyəsi ilə məşğul olması barədə baş idarəyə məlumat daxil olduqdan sonra yaradılan əməliyyat qrupuna rəhbərlik edib. 2023-cü il aprelin 14-də Ələt qəsəbəsində keçirilən əməliyyat zamanı Rəşad Əhmədov şübhəli şəxs qismində saxlanılıb.

Daha sonra hakim şahidlərin dindirilməsinin başa çatdığını, işdə olan sənədlərin tədqiqinə başlanıldığını elan edib. Bundan sonra sədr tərəfindən təqsirləndirilən şəxslərdən özlərini təqsirli bilib-bilməmələri soruşulub.

Azər Səricanov bildirib ki, onların Fazil Mustafanı öldürmək niyyətləri olmayıb, sadəcə cəzalandırmaq istəyiblər. O, Fazil Mustafanın siyasi fəaliyyətinə görə yox, dinə qarşı çıxışlarına görə bu əməli törətdiklərini vurğulayıb.