Gel-lak etdirənlərin bilmədikləri detallar | Əsas təhlükə budur ki...

Dırnaqlara gel-lak çəkərkən bir neçə aydan bir fasilə vermək tövsiyə olunur. Bu, dırnaqların uzunmüddətli örtükdən sonra bərpası və sağlamlığının yoxlanması üçün vacibdir.

Bu barədə "Gazeta.Ru"ya dermatoloq Olesya Dubenko məlumat verib.

Əgər gel-laklı dırnaqlarınızda tez-tez çatlamalar, soyulmalar, dırnaq lövhəsinin incəlməsi, yataq hissəsində qalınlaşma, rəng dəyişikliyi və ya deformasiya görürsünüzsə, mütləq dermatoloqa müraciət etməlisiniz.

Dırnaq və kutikulanın sağlam qalması üçün daim nəmləndirici kremlər, müalicəvi laklar və xüsusi yağlar istifadə edilməlidir. Bu məhsullar dırnaqları gücləndirir və problemlərin qarşısını alır.

Həkimin sözlərinə görə, gel-lakların tərkibində olan metilmetakrilat maddəsi xüsusilə təhlükəlidir. Əgər gel-laklar təbii dırnaqdan daha sərt olarsa, zərbə zamanı yük birbaşa dırnağa düşür və bu da onun zədələnməsinə səbəb olur.

Üstəlik, gel-lakın daha yaxşı yapışması üçün dırnaq səthi kobudlaşdırılır, çıxarılan zaman isə üst təbəqəsi soyulur. Bu isə dırnağın zəifləməsinə gətirib çıxarır. Gel-lakı uzun müddət saxladıqda dırnaqla örtük arasında boşluqlar yaranır. Bu boşluqlarda göbələk və ya bakteriya infeksiyaları inkişaf edə bilər.