Gəlinini öldürməkdə təqsirli bilinən qayınata hakim qarşısında

Maştağa qəsəbəsində gəlinini qətlə yetirməkdə təqsirləndirilən Ağanəbi Əliyevin cinayət işi üzrə məhkəmə hazırlıq iclası keçirilib.

Bakı Ağır Cinayətlər Məhkəməsində hakim Vüqar Seyidovun sədrliyi ilə baş tutan ilk prosesdə təqsirləndirilənin anket məlumatları dəqiqləşdirilib. Ağanəbi Əliyev barədə seçilmiş həbs qətimkan tədbirinin dəyişdirilmədən cinayət işinin məhkəmə istintaqına verilməsi ilə bağlı qərar qəbul edilib.

Sentyabrın 18-də keçirilməsi nəzərdə tutulan prosesdə təqsirləndirilənə ittiham aktının elan edilməsi və onun iclasda sərbəst ifadəsi gözlənilir.

Qeyd edək ki, hadisə 2025-ci ilin mayında Sabunçu rayonunun Maştağa qəsəbəsində Nəriman Nərimanov küçəsi 71, mənzil 62 ünvanında baş verib. 66 yaşlı Ağanəbi Əliyev 33 yaşlı gəlini Dürdanə Əliyevanı bıçaqlayaraq qətlə yetirməkdə şübhəli bilinərək saxlanılıb.

Hadisənin tərəflər arasındakı mübahisə zamanı işlədilən sərt ifadələr nəticəsində törədildiyi bildirilir.

Onu da qeyd edək ki, qətlə yetirilən Dürdanə Əliyeva üç azyaşlı övlad anası olub.

Faktla bağlı Sabunçu Rayon Prokurorluğunda Cinayət Məcəlləsinin 120.1-ci, qəsdən adam öldürmə maddəsi ilə cinayət işi açılaraq ittiham irəli sürülüb.