Geyim namusdan xəbər vermir | İlahiyyatçının açıqlaması müzakirələrə səbəb oldu - AMİN

Baku TV-də “Amin” adlı yeni veriliş yayımlanıb.

Verilişin ilk buraxılışında “Din nə üçün lazımdır” sualı ətrafında müzakirə aparılıb.

İlahiyyatçı Elvüsal Məmmədov qeyd olunan sual haqqında bildirib ki, din bəşəriyyətə məlum ən qədim institutlardan biridir. Tarix boyunca inanc, adət-ənənələr, əxlaq, hüquq sistemi, sosial münasibətlər din tərəfindən müəyyən olunub:

“Tarixən ən böyük mədəniyyətləri din yaradıb. Buna görə dinlər insanların həyatında əhəmiyyətli yer tutur. Dinlər insan ruhunun mahiyyətini əmələ gətirən mənəviyyatın əsas qidasıdır. İnsan təkcə intellektual, bioloji məxluq deyil. O həm də mənəvi varlıqdır. İnsanın mənəviyyatını təkcə elm, incəsənət doyuzdura bilmir. Onun ruhu inancla iç-içə olanda rahatlıq tapır”.

İlahiyyatçının sözlərinə görə, ateist insanın əxlaqlı olması mümkündür, lakin əxlaqa sadiq qalması mümkün deyil:

“Namus anlayışından söz açsaq, 40 il bundan əvvəl bir azərbaycanlının gözündə namusun konturlarını cızan ayrı-ayrı anlayışlar var idisə, bu gün onlar başqaları ilə dəyişilib. Əvvəllər kişinin nəzərində qadının daha çox don geyinməsi namusu göstərən davranış norması hesab olunurdusa, bu gün isə artıq həmin davranış normasından imtina olunub və qadının şalvar geyinməsi kişinin namusuna xələl gətirən davranış kimi görülmür. Yəni geyim insanın əxlaqından və ya namusundan birbaşa xəbər vermir”.

Şair Şəhriyar Del Geraninin sözlərinə görə, Azərbaycanda maarifçilik və aydınlanma məsciddən “qaçmaqla” başlayıb:

“Ömər Faiq Nemanzadə, Mirzə Cəlil Məmmədquluzadə məsciddən qaçıb “Molla Nəsrəddin” jurnalını yaratdılar. Həsən bəy Zərdabi atasına “mən molla olmayacağam” dedi və “Əkinçi” qəzetini yaratdı. Düşünürəm ki, bəlkə, məscidin içində belə islahatlara getmək Azərbaycan cəmiyyətinə daha çox şey verərdi. Bu kontekstdə bir mollanın Azərbaycanda dinə vurduğu zərbəni heç bir ateist vura bilməz”.