Gilas ürək üçün əsl dərman imiş? - Fayda və zərərləri

Gilas hamar və parlaq səthə malik, qırmızı, qara və ya sarı rəngdə olan şirin bir yay meyvəsidir. Təkcə ləzzəti ilə deyil, sağlamlıq baxımından da olduqca qiymətli sayılır. Bu meyvə A, C, K və B vitaminləri ilə yanaşı kalium, maqnezium, kalsium və antioksidantlarla da zəngindir.

Mütəxəssislər bildirirlər ki, mədə-bağırsaq pozuntuları və ya diabet kimi xüsusi əks göstərişlər yoxdursa, gilası hər gün qəbul etmək olar. Lakin gündəlik istehlak miqdarı təxminən 150-200 qramı keçməməlidir. Çünki yüksək şəkər və lif tərkibi həzm sisteminə təsir edərək qaz, ishal və həzmsizlik yarada bilər. Həmçinin qan şəkərini sürətlə yüksəldə bilər.

Gilasın başqa bir vacib üstünlüyü isə qan dövranını yaxşılaşdırmaq və prostat sağlamlığını dəstəkləmək qabiliyyətidir. Tərkibindəki antioksidantlar ürək-damar xəstəlikləri riskini azaldır və yaşla bağlı degenerativ proseslərin qarşısını almaqda mühüm rol oynayır.

Əzələ ağrılarından əziyyət çəkənlər və ya ağır fiziki işlə məşğul olanlar üçün gilas xüsusilə tövsiyə edilir. Onun tərkibindəki mikroelementlər əzələlərdəki spazmanı azaldır, qan dövranını yaxşılaşdırır və bərpanı sürətləndirir.

Bununla belə, allergiyaya meyilli şəxslər diqqətli olmalıdırlar. Qırmızı gilasa reaksiya verənlər üçün ağ və ya sarı gilas növləri daha təhlükəsiz seçim hesab olunur.