"Görmədim, sərnişin icazəsiz etdi" | Belə təhlükə yaradanları hansı cəza gözləyir? - Baku TV

Sərnişinlərin avtomobildən yolun hərəkət hissəsi tərəfdən, yəni sol qapıdan düşməsi həm təhlükə yaradır, həm də cərimə ilə nəticələnə bilər.

Xüsusilə nəqliyyatın sıx hərəkət etdiyi ərazilərdə sürücülərin avtomobili yolun hərəkət hissəsində saxlayaraq sərnişini sol tərəfdən düşürməsi digər nəqliyyat vasitələri üçün ciddi təhlükə yaradır.

Qaydalara əsasən, sərnişin avtomobilə yolun sağ tərəfindən əyləşməli və nəqliyyat vasitəsini də sağ tərəfdən tərk etməlidir. Yolun hərəkət hissəsi tərəfdən avtomobilə minib-düşmək təhlükəsizlik baxımından yolverilməz hesab olunur.

Nəqliyyat eksperti Eldəniz Cəfərovun sözlərinə görə, “Yol hərəkəti haqqında” qanunun 41-ci maddəsinə əsasən, sərnişinin avtomobilə yolun sol tərəfindən minib-düşməsi qadağandır. İnzibati Xətalar Məcəlləsinin 338.3-cü maddəsinə əsasən isə bu qaydanın pozulmasına görə sərnişin 30 manat məbləğində cərimə oluna bilər.

Qeyd edək ki, son zamanlar bəzi sürücülərin sərnişinləri avtomobildən sol tərəfdən düşürməsi digər hərəkət iştirakçıları üçün təhlükə yaradıb. Bəzi hallarda bu qayda pozuntuları qəzalara da səbəb olub.