Gürcü müğənni Rəşid Behbudovun mahnısını oxudu

Gürcüstanın tanınmış estrada müğənnisi Veriko Turaşvili görkəmli Azərbaycan müğənnisi Rəşid Behbudovun “Bahar sənsiz” mahnısına klip çəkdirib.

Bu barədə Baku TV-yə müsahibə verən gürcü müğənni klipin çəkilişlərinin Gürcüstanda baş tutduğunu deyib.

“Rəşid Behbudovun repertuarından olan “Bahar sənsiz” mahnısı üzərində uzun müddətdir ki, çalışırdım. Tbilisidə Rəşid Behbudovun yubiley tədbirində iştirak edərkən, məndə bu fikir yarandı və bu mahnını ifa etmək qərarına gəldim. Düşünürəm ki, bu mahnı mənim ifamda da Azərbaycan xalqının sevgisini qazanacaq”, – V.Turaşvili söyləyib.

Veriko Turaşvili Azərbaycana olan sevgisindən də danışıb: “Azərbaycan xalqını, mədəniyyətini, eləcə də Bakını, xüsusilə də Qarabağ bölgəsini çox sevirəm. Çox şadam ki, Azərbaycan öz torpaqlarını işğaldan azad etdikdən sonra mən də Qarabağda səfərdə oldum”.

Veriko Turaşvili gələcək planlarından da söhbət açıb. O, növbəti hədəfinin “Laçın” mahnısına elə Laçın rayonunda klip çəkdirmək olduğunu deyib.

Qeyd edək ki, Gürcüstanın tanınmış estrada müğənnisi Veriko Turaşvili bir müddət öncə “Sarı gəlin” mahnısına da klip çəkdirib.