"Gürcüstandakı ermənidilli məktəblərdə kadr çatışmazlığı yoxdur, azərbaycandilli isə..." - Baku TV

Yeni tədris ilinin başlamasına bir aydan da az vaxt qalıb. Azərbaycan Elm və Təhsil Nazirliyinin məlumatına görə, Gürcüstandakı azərbaycandilli məktəblərin ibtidai sinif müəllimləri üçün xüsusi təlim proqramı hazırlanıb.

Qonşu ölkədəki Azərbaycan məktəblərinin hazırlıq səviyyəsi və mövcud problemlər barədə “Maarif” QHT-nin sədri Aygül İsayeva məlumat verib.

Onun sözlərinə görə, təhsil sahəsində bir sıra yeniliklər gözlənilir. Belə ki, 1–6-cı siniflərdə vahid məktəbli forması tətbiq olunacaq, dərs zamanı şagirdlərin mobil telefonlardan istifadəsi tamamilə qadağan ediləcək. Eyni zamanda qeyri-gürcüdilli məktəblərdə gürcü bölmələrinin açılması nəzərdə tutulur, lakin tədris dilinin seçimi valideynlərin istəyinə bağlı olacaq.

A.İsayeva vurğulayıb ki, məktəblərdə kadr çatışmazlığı əsas problem olaraq qalır. Xüsusilə Azərbaycan dili və ədəbiyyatı müəllimlərinin kəskin qıtlığı yaşanır. Ölkədə son 20 ildə bu ixtisas üzrə kadr hazırlanmadığı üçün dərsləri bəzən orta təhsilli şəxslər və ya qeyri-ixtisas müəllimləri tədris etmək məcburiyyətində qalırlar.