Hakimin sualı həkimi çətin duruma saldı | “Talassemiya işi”ndə yeni faktlar

Talassemiyalı uşaqlar üçün toplanmış bir milyon manata yaxın vəsaiti mənimsəməkdə təqsirləndirilən Nuridə Seyidova, Aynur Bayramova və Aysel Məmmədovanın cinayət işi üzrə növbəti məhkəmə prosesi keçirilib.

Talassemiya Mərkəzinin sabiq işçisi Xuraman Cəfərova mərkəzdə əvvəl həkim, daha sonra isə baş həkim kimi işlədiyini deyib. Bununla yanaşı, o, ifadəsi zamanı bildirib ki, neqativ hallarla rastlaşdıqda mərkəzin rəhbərliyinə vaxtında məlumat verib. Təqsirləndirilən şəxs Aynur Bayramovanı mərkəzə xəstələrlə birgə gəlib-gedən kuryer kimi tanıdığını bildirib.

Onun bu ifadəsi bəzi zərərçəkənlərin etirazı ilə qarşılanıb. “Necə olur ki, təqsirləndirilən şəxslər mərkəzdə açıq-aşkar pasiyentlərin qeydiyyatını apardıqları halda baş həkimin bundan xəbəri olmur?”, – deyə onlar iradlarını bildiriblər.

Xuraman Cəfərova isə buna cavab olaraq deyib ki, bu hallar onun çalışdığı dönəmdən əvvəl olub. Onun bildirdiyinə görə, sözügedən faktlar əvvəlki baş həkim Afaq Nəsibovanın çalışdığı vaxta təsadüf edib.

Təqsirləndirilən Aynur Bayramova isə sabiq baş həkimi yalan danışmaqda ittiham edərək onunla telefon danışıqlarının, səs qeydlərinin və yazışmalarının olduğunu deyib. Bununla yanaşı, təqsirləndirilən onu da vurğulayıb ki, Xuraman Cəfərova onların mərkəzdə fəaliyyət göstərməsi üçün hətta otaq da ayırıbmış.

Tanınmış həkim Mircəlal Kazımi prosesdə yenidən əlavə şahid kimi dindirilib. Zərərçəkən Kamil Əhmədov bildirib ki, həkim Mircəlal Kazıminin iştirakı ilə həyat yoldaşının qaraciyər əməliyyatına görə 46 min manat tələb edilib. Lakin xəstənin yaxınları bu məbləğin 23 min manatını hazırlayaraq vasitəçilik edən təqsirləndirilənlərə təqdim edə biliblər. Məbləğin digər hissəsi ödənilmədiyindən xəstə əməliyyata alınmayıb və dünyasını dəyişib.

Prosesi idarə edən hakimlərdən Şəlalə Həsənovanın həkimə "Pula görə insanlığı bu dərəcədə arxa plana atmaq olarmı?" sualı tanınmış həkimi çətin duruma salıb. Kazımi "Bu, qlobal bir problemdir, möhtərəm hakim, bunun cavabı məndə deyil", – deyə cavab verib.

Daha sonra zərərçəkənlər Talassemiya Mərkəzinin sabiq direktoru Valeh Hüseynovun əlavə şahid kimi prosesdə dindirilməsi ilə bağlı vəsatət veriblər. Vəsatət təmin olunmadan rədd edilib.