Hansı fənnlər üzrə vakant yerlərin sayı artdı? | MÜTDA-dan açıqlama

“Test imtahanı mərhələsində ümumilikdə 50 264 namizəd iştirak edib. Onların arasından seçilmiş 5740 namizəd müsahibə mərhələsinə dəvət olunub. Müsahibə mərhələsi avqustun 22-dək davam edəcək”.

Bunu Məktəbəqədər və Ümumi Təhsil üzrə Dövlət Agentliyinin mətbuat katibi Zenfira Sevdimalı jurnalistlərə açıqlamasında deyib.

Onun sözlərinə görə, müəllimlərin işə qəbulu müsabiqəsində 10 500 vakant yer təqdim olunub. Bu, ötən illərlə müqayisədə daha çox rəqəm deməkdir.

Xüsusilə sertifikasiya prosesindən sonra ibtidai sinif və Azərbaycan dili fənni üzrə vakant yerlərin sayında 50 faizdən çox artım var.

“Bizə daxil olan müraciətlər daha çox vakansiyaların olmaması və yaxud az olması ilə bağlı yox, namizədlərin daha çox yaşayış yerlərinə uyğun şəhər, paytaxt və mərkəz məktəblərini seçmək istəmələri ilə bağlıdır. Elə bu istiqamətdə də deyə bilərik ki, bəzi hallarda bir çox vakansiyalar, ümumiyyətlə, namizədlər tərəfindən seçilmir”, – deyə Z.Sevdimalı əlavə edib.