Hansı sürücülər 6 min manat cərimələnəcək? | Maşın bazarlarında dələduzluq

Avtomobil alarkən hər kəs etibarlı seçim etmək istəyir. Amma bəzən alıcılar elə dələduzluqlarla qarşılaşırlar ki, həm maddi ziyana düşür, həm də hüquqi cəhətdən problemlərə tuş gəlirlər.

Avtomobillərin qiymətinə müxtəlif nüanslar təsir edir. Buraya istehsal ili, mühərrikin həcmi, texniki vəziyyəti, qəzaya düşüb-düşməməsi və digər məqamlar aiddir.

Maşının qiymətinə ən çox təsir edən amillərdən biri də onun indiyədək qət etdiyi məsafədir. Azərbaycanda avtomobillərin qiymətini süni surətdə artırmaq üçün bəzi işbazlar kilometrajı geri çəkir. Bazarda xaricdən gələn avtomobillərin VIN-kodlarının silinməsi, qəza keçirmiş maşınların təzə adı ilə satılması hallarına da az rast gəlinmir.

Bəs dələduzluğa əl atanları hansı cəza gözləyir? Hüquqşünas Hikmət Əliyev Baku TV-yə məsələ ilə bağlı açıqlama verib.

“İstehlakçıya 300 manatdan az maddi zərər vurulduğu halda fiziki şəxslər 350 manatdan 500 manatadək, vəzifəli şəxslər 1500 manatdan 2 min manatadək, hüquqi şəxslər isə 4 min manatdan 6 min manata qədər məbləğdə cərimə edilə bilərlər. 300 manatdan çox ziyana uğradıqda isə 3 min manatdan 5 min manata qədər cərimə və ya 360 saatdan 480 saata qədər ictimai işlər növündə cəza nəzərdə tutulur”, – deyə o bildirib.