Hava şəraiti ilə bağlı əhaliyə xəbərdarlıq

İyunun 4-dən 9-a qədər respublika ərazisində hava şəraiti kəskin dəyişəcək.

Milli Hidrometeorologiya Xidmətinin məlumatına görə, yaxın günlərdə ölkə ərazisində hava şəraitinin qeyri-sabit keçəcəyi, yağıntılı olacağı proqnozlaşdırılır. Ayrı-ayrı bölgələrdə yağıntının leysan xarakterli olacağı, şimşək çaxacağı, dolu düşəcəyi ehtimal olunur.

Qeyd olunanları nəzərə alan Fövqəladə Hallar Nazirliyi əhaliyə müraciət edib və gözlənilən hava şəraiti ilə bağlı təhlükəsizlik qaydalarına riayət etməyə çağırıb. Yağıntılarla əlaqədar bəzi çaylarda sel və daşqın təhlükəsi yarandığından həmin ərazilərdən uzaq durmaq, belə təhlükə ilə üzləşdikdə yaxınlıqdakı yüksəkliyə qalxmaq tövsiyə olunur.

“Həmçinin ildırımla bağlı təhlükələrdən qorunmaq üçün elektrik cihazlarını şəbəkədən ayırmaq, telefonla danışmamaq, avtomobildə olduqda isə hərəkəti dayandıraraq şüşələri qaldırıb ildırımın bitməsini gözləmək tövsiyə edilir”, – deyə qurumun müraciətində qeyd olunub.