Hava şəraiti ilə bağlı əhaliyə xəbərdarlıq | Hava haqqında məlumat

Noyabrın 25-i axşamdan Bakıda və Abşeron yarımadasında arabir leysan xarakterli yağış yağacağı gözlənilir.

Bu barədə Milli Hidrometeorologiya Xidməti məlumat yayıb.

Bildirilib ki, noyabrın 26-sı gündüz yağıntıda fasilə olacaq. Axşam saatlarından yağışın yenidən başlayacağı, leysan xarakterli intensiv olacağı və noyabrın 27-si gündüzədək davam edəcəyi gözlənilir. Yarımadanın bəzi yerlərində şimşək çaxacağı ehtimalı var.

Azərbaycanın bəzi rayonlarında isə müşahidə olunan yağıntılı hava şəraitinin noyabrın 27-si gündüzədək fasilələrlə davam edəcəyi, yağıntıların ayrı-ayrı yerlərdə leysan xarakterli intensiv olacağı, şimşək çaxacağı, dağlıq və dağətəyi rayonlarda isə qar yağacağı gözlənilir.

Yağıntılarla əlaqədar çaylarda sululuğun artacağı, bəzi dağ çaylarında, xüsusilə də Lənkəran-Astara bölgəsinin bəzi çaylarından qısamüddətli daşqın və sel keçəcəyi ehtimalı var.