Həcc ziyarətinə gedənlərə vacib xəbər | QMİ məlumat yaydı

Azərbaycandan Həcc ziyarəti üçün kvota azaldılıb.

Bu haqda Qafqaz Müsəlmanları İdarəsinin Xarici Əlaqələr şöbəsinin müdiri Vüsal Cahangiri bildirib.

“Bəzi səbəblərə görə Qafqaz Müsəlmanları İdarəsinin rəhbərliyi kvotanı 1500 nəfərə endirdi. Əslində, bu rəqəm 2000 nəfəri üstələyirdi. Əsas səbəblərdən biri 2023-cü ilin iyul ayının sonlarında Səudiyyə Ərəbistanı Krallığının Həcc və Ümrə Nazirliyinin Azərbaycan vətəndaşları üçün asan elektron viza sistemi şəraiti yaratması oldu.

Məlumata görə, bəzi işbaz şirkətlər Həcc ziyarətinə aparmaq adı ilə vətəndaşları aldadaraq onlara təşviqedici qiymətlər təklif edib. Vətəndaşlar bilməlidirlər ki, həmin turizm vizaları ilə Həcc ziyarətini yerinə yetirə bilməyəcəklər. Çünki Həccin unikal viza sistemi var. Çoxsaylı vətəndaşlarımız aldanaraq işbazların onları Həcc ziyarətinə götürmələrini gözləyirlər. Bu səbəbdən bizə müraciətlərin sayı azalıb. Ona görə də Qafqaz Müsəlmanları İdarəsi kvotanı bir qədər aşağı endirmək məcburiyyətində qaldı”, – o qeyd edib.

Xatırladaq ki, fevralın 12-dən Azərbaycandan Həcc ziyarətinə getmək üçün sənəd qəbuluna başlanılıb.1 nəfərlik ziyarət paketinin qiyməti 5 850 dollar, təxminən 9 945 Azərbaycan manatıdır.