Həkimdən xəbərdarlıq: Bu dərmanlar ürək, qaraciyər, təzyiq problemləri yaradır

Səs yazısından da aydın olduğu kimi, sosial şəbəkələrdə, arıqlamaq və ya kökəlmək istəyən insanlara qida əlavəsi adı ilə naməlum preparatlar təklif olunur. Üstəlik, zəmanət də verilir.

Əlbəttə, bu vədlərə aldanıb, həmin preparatların orqanizmə mənfi təsirinin olmadığına inananlar da az deyil. Lakin dərd odur ki, bəzi şəxslər zərərli olduğunu bildikləri halda bu vasitələrdən istifadə edərək özlərini zəhərləyirlər.

Qeyd edilən dərmanlarla bağlı AQTA-dan bildirilib ki, sözügedən vasitələrin heç birinin adı agentliyin sertifikatla təmin olunan bioloji aktiv qida əlavələri siyahısında yoxdur. Yəni satışı qadağan olunan vasitələrdir. Həkimlər isə arıqlamaq və ya kökəlmək üçün bu cür preparatları çarə olaraq görənlərə xəbərdarlıq edir.

Farmokoloq Aydın Əliyev qeyd edib ki, arıqlamaq üçün olan dərmanların çoxu baş-beyində aclıq mərkəzini ləngidir, doyma hissini artırır: “Həmin insanlarda maddələr mübadiləsi zəifləyir. Belə vasitələr adrenalinin təsirini artırır. Bu isə ürək döyüntüsünün, qan təzyiqinin artmasına, yuxusuzluq, əsəbiliyin, ağızda quruluğun yaranmasına səbəb olur. Belə dərmanların qəbulu bir neçə aydan çox davam etdikdə isə insan bədəni buna adət edir, artıq arıqlamaq əvəzinə kökəlməyə başlayır”.