Həkimlərdən bu balın növü ilə bağlı ciddi xəbərdarlıq | Sağlamlığınız üçün riskli olan qida

Türkiyənin məşhur həkim və sağlam qidalanma mütəxəssisi, professor Canan Karatay insan sağlamlığı üçün riskli hesab olunan bir qida ilə bağlı vacib xəbərdarlıq edib.

C.Karatay “dəli bal” adlanan xüsusi növ balın tərkibindəki toksinlərin ciddi sağlamlıq problemlərinə səbəb ola biləcəyini bildirib.

Dəli bal əsasən Qara dəniz bölgəsində yetişən rhododendron, başqa sözlə desək, orman gülü bitkisinin çiçəklərindən alınır. Bu balın tərkibində qrayanotoksin adlı toksik maddə var. Onu çox yedikdə, hətta adamı müvəqqəti dəli edə bilər.

Canan Karatay qeyd edib ki, dəli balın bir qaşığı belə bu qidaya öyrəşməmiş bədənlərə ciddi ziyan verə bilər. Xüsusilə hamilə qadınlara və süd verən analara bu baldan uzaq durmaq tövsiyə olunur.

Qeyd edək ki, dəli bal müalicə məqsədli və nəzarətli şəkildə istifadə olunur. O acı və tünd bir dada malikdir.