Hərbi Prokurorluqdan Bağanıs Ayrım soyqırımı ilə bağlı açıqlama

Bağanıs Ayrım soyqırımını törətməkdə cinayətləri sübuta yetirilmiş 18 nəfər beynəlxalq axtarışdadır.

Bu barədə Hərbi prokurorun böyük köməkçisi – Hərbi Prokurorluğun Mətbuat Xidmətinin rəhbəri Firad Əliyev məlumat verib.

O qeyd edib ki, Azərbaycan vətəndaşlarına qarşı törədilmiş sülh və insanlıq əleyhinə, müharibə, terrorçuluq cinayətlərinin və digər cinayətlərin istintaqı, onlara hüquqi qiymət verilməsi, həmin cinayətlərin təşkili və törədilməsində iştirak etmiş şəxslərin müəyyənləşdirilərək mövcud qanunvericiliyə əsasən cinayət məsuliyyətinə cəlb edilməsi, habelə beynəlxalq hüquq normalarının kobud şəkildə pozulması faktları ilə bağlı beynəlxalq təşkilatlar qarşısında müvafiq vəsatətlər qaldırılması məqsədilə 2003-cü il dekabrın 18-də Baş prokurorun, Daxili İşlər və Milli Təhlükəsizlik Nazirlərinin vahid əmri ilə birgə istintaq-əməliyyat qrupu yaradılıb.

Firad Əliyevin sözlərinə görə, soyqırımı ilə əlaqədar 18 nəfər barəsində Cinayət Məcəlləsinin bir sıra maddələri üzrə başlanan cinayət işi davam etdirilir.