HHM bölmələri şərti düşməni məhv edib

Noyabrın 18-də müdafiə naziri Zakir Həsənov və nazirliyin digər rəhbər heyəti döyüş hazırlığının qəfil yoxlanılması məqsədilə Hərbi Hava Qüvvələrinin Hava Hücumundan Müdafiə bölmələrindən birində olub.

Bu barədə Müdafiə Nazirliyindən məlumat verilib.

Bildirilib ki, Zakir Həsənov komandirlərin qərar qəbuletmə və qüvvələrin tətbiqi üzrə praktiki bacarıqlarını, eləcə də bölmələrin döyüş hazırlığını yoxlayıb, onların praktiki döyüş atışlarını izləmək üçün təlim poliqonunda olub.

Bölmələrin döyüş fəaliyyətlərinin planlaşdırılması və idarəedilməsi üzrə tapşırıqlar icra olunduqdan sonra praktiki atışlar yerinə yetirilib. Şərti düşmənin aşkar olunan hava hədəfləri məhv edilərək qarşıya qoyulmuş tapşırıqlar müvəffəqiyyətlə icra edilib.

Müdafiə naziri Hərbi Hava Qüvvələrinin Hava Hücumundan Müdafiə bölmələrinin döyüş hazırlığını yüksək qiymətləndirib.