Hövsanda hər kəsi heyrətləndirən ev | “Köhnə əşyalara ikinci həyat verdik”

Baku TV Hövsan kəndində yaşayan kolleksioner Elnur Kazımovun evindən reportaj hazırlayıb.

O, illərdir evində qədim əşyaların zəngin kolleksiyasını toplayır: buraya mis məişət əşyaları, xalça-palazlar, patefon və digər tarixi dəyərə malik eksponatlar daxildir.

Şərqşünaslıq fakültəsini bitirən kolleksioner bildirir ki, qədim əşyalara marağı məhz tələbəlik illərində yaranıb və zaman keçdikcə bu maraq onun sevimli hobbisinə çevrilib.

Elnur Kazımov evində şəxsi kitabxanasını da böyük qayğı ilə qoruyub saxlayır. O, ayrıca bir otaq inşa etdirərək burada 6500-dən çox kitab yerləşdirib. Bundan əlavə, 2500-dən artıq kitab hələ də rəflərə düzülməyib.

Kolleksionerin sözlərinə görə, kitabxanasında elə nadir nüsxələr var ki, onlara hətta Milli Kitabxanada belə rast gəlinmir. Onun arxivində məşhur “Molla Nəsrəddin” jurnalının müxtəlif nüsxələri də yer alır.

Elnur Kazımov kolleksiyasının ən qiymətli tapıntısının “Füyuzat” jurnalının bütün nömrələrinin toplandığı cild olduğunu və onu 350 manata əldə etdiyini bildirib.