İcra hakimiyyəti məni qəbul etdi, amma… | Kanalizasiya suyu içində yaşayan sakinlər

Bayıl qəsəbəsi, Əlibəyov qardaşları, 126 ünvanında yerləşən binalardan birində vətəndaşın evi bir aydır kanalizasiya suyunun altında qalıb.

Belə ki, sözügedən binada qonşu mənzilin kanalizasiya suyu şikayətçi Solmaz Eyyubovanın hamamına tökülür.

Ev sahibinin sözlərinə görə, məsələ ilə bağlı müvafiq qurumlara müraciət edilsə də, problem həll olunmayıb:

“Qırx ildir burada yaşayıram, belə şey görməmişəm. Yuxarı mərtəbədə yaşayan sakin evini söküb, orada texnika ilə işlər aparıb. Söküntü zamanı kanalizasiya sistemini məhv edib, evim pis günə qalıb. Kanalizasiya suyu başıma axır. Nəsə götürmək istəyəndə içəriyə çətirlə daxil oluram”.

Məsələ ilə bağlı İri Şəhərlərin Birləşmiş Su Təchizatı Xidmətindən bildirilib ki, naməlum şirkət tərəfindən aparılan inşa işləri qəsəbədə bir neçə ünvanda kanalizasiya xəttinin zədələnməsinə səbəb olub. Nəticədə vətəndaşların kanalizasiya şəbəkələrində problemlər yaranıb. Məsələ ilə bağlı şirkətin müəyyənləşdirilməsi və vurduğu zərərin aradan qaldırılması istiqamətində müvafiq icra orqanlarına müraciət olunub.

Səbail Rayon İcra Hakimiyyətindən isə bildirilib ki, sözügedən ünvana aidiyyəti qurumların nümayəndələrinin iştirakı ilə birgə baxış keçirilib və görülən tədbirlər nəticəsində işlər dayandırılıb. Ünvan nəzarətdə saxlanılır və həmin ərazidə heç bir iş aparılmır.