İnsanların gördüyü yuxular nələrdən xəbər verir?

İtaliya tədqiqatçıları insan yuxularının təsadüfi olmadığını və bunlara müxtəlif amillərin təsir göstərdiyini üzə çıxarıblar.

Bu barədə “Euronews” məlumat yayıb.

Araşdırma zamanı 18-70 yaş arası 287 iştirakçının 3700-dən çox yuxu və oyanma təcrübəsi haqqında hesabatı analiz edilib.

İki həftə ərzində könüllülər öz təcrübələrini qeydə alıblar, tədqiqatçılar isə yuxu keyfiyyəti, koqnitiv modellər, şəxsiyyət xüsusiyyətləri və psixoloji göstəricilər barədə ətraflı məlumat toplayıblar.

Elm adamları iştirakçıların gündəlik həyatlarını və yuxularını necə təsvir etdiklərini təhlil etmək üçün təkmilləşdirilmiş təbii dil emalı metodlarından da istifadə ediblər.

Nəticələr göstərib ki, yuxular heç də təsadüfi deyil, burada aydın qanunauyğunluqlar mövcuddur. İnsan yuxuları daxili xüsusiyyətlər və xarici təsirlərin birləşməsini əks etdirir.

Gün ərzində bir-biri ilə əlaqəsiz düşüncələrə malik olan insanlar tez-tez dağınıq, sürətlə dəyişən yuxular gördüklərini bildiriblər. Əksinə, yuxuları əhəmiyyətli hesab edənlər onları daha canlı və maraqlı kimi qəbul ediblər.

Xarici hadisələr də rol oynayır. Tədqiqatlar göstərib ki, COVID-19 pandemiyası dövründə yuxular daha intensiv olub, əsasən tətbiq edilən məhdudiyyətləri əks etdirib. Gündəlik həyat normallaşdıqca bu cür yuxular azalıb, bu da yuxuların psixoloji vəziyyətimizlə birlikdə dəyişdiyini göstərir.

“Araşdırmanın nəticələri göstərir ki, yuxular, sadəcə, keçmiş təcrübənin əks olunması halı deyil, həm də kim olduğumuz və yaşadıqlarımız tərəfindən formalaşan dinamik prosesdir”, – tədqiqatın aparıcı müəllifi Valentina Else vurğulayıb.