İsti otaqda belə üşüyən ayaqlar ciddi xəstəliyin əlaməti ola bilər

Payız və soyuq havalarda ayaqların üşüməsi çoxları üçün adi haldır. Lakin isti mənzildə, hətta qalın corab və yorğan altında belə ayaqlar daim soyuq qalırsa, bu, orqanizmdə müəyyən problemlərdən xəbər verə bilər.

Bu barədə həkim-terapevt Oksana Serebryakova məlumat verib.

Mütəxəssisin sözlərinə görə, uzun müddət hərəkətsiz qalmaq, oturaq həyat tərzi və fiziki aktivliyin azlığı ayaqlarda soyuqluq hissini artıra bilər. Ancaq simptom davamlıdırsa, səbəb daha ciddi ola bilər. Belə hallarda Reyno xəstəliyi, ayaq damarlarında qan dövranı pozğunluğu və ateroskleroz ehtimalı nəzərdən keçirilir.

Varikoz, qalxanabənzər vəzinin zəif fəaliyyəti, xüsusilə hipotireoz, eləcə də dəmir çatışmazlığı anemiyası da ayaqların daim üşüməsinə səbəb ola bilər. Şəkərli diabet zamanı damar və sinir zədələnmələri, həmçinin polineyropatiya da bu simptomla özünü göstərə bilər.

Əgər ayaqların üşüməsi ilə yanaşı, keyimə, qarışqa gəzməsi, yanğı, dərinin rənginin dəyişməsi, şişkinlik, qıcolma və ya yeriyərkən ağrı yaranırsa, həkimə müraciət etmək vacibdir.