“IT SkillSprint” proqramını başa vuran tələbələri hansı imkanlar gözləyir? - Baku TV

Rəqəmsal İnkişaf və Nəqliyyat Nazirliyi, Elm və Təhsil Nazirliyi, İnnovasiya və Rəqəmsal İnkişaf Agentliyi, Elm və Ali Təhsil üzrə Dövlət Agentliyi və “Ironhack” tədris şirkətinin tərəfdaşlığı ilə həyata keçirilən ali təhsil müəssisələrində rəqəmsal bacarıqlar üzrə beynəlxalq intensiv təhsil proqramı – “IT SkillSprint” layihəsinə yekun vurulub.

Proqramı ölkənin müxtəlif ali təhsil müəssisələrinin üçüncü kursunda təhsil alan 120 tələbə uğurla başa vuraraq məzun olub.

Tədbirin açılışında rəqəmsal inkişaf və nəqliyyat nazirinin müavini Rəşad Həsənov, elm və təhsil nazirinin müavini Həsən Həsənli və layihənin beynəlxalq tərəfdaşı olan “Ironhack” şirkətinin direktoru Gonzalo Manrique Sabatel çıxış ediblər.

Çıxışlarda rəqəmsal bacarıqların inkişaf etdirilməsinin ölkənin insan kapitalının gücləndirilməsi, informasiya texnologiyaları sahəsində ixtisaslı kadr potensialının formalaşdırılması və gənclərin qlobal əmək bazarına hazırlanması baxımından əhəmiyyəti vurğulanıb.

Qeyd edək ki, iştirakçılar proqram çərçivəsində data analitikası və süni intellekt, kibertəhlükəsizlik və süni intellekt, veb-proqramlaşdırma və süni intellekt, eləcə də DevOps və süni intellekt istiqamətləri üzrə hibrid formatda təhsil alıblar.

Altı ay davam edən intensiv tədris müddətində iştirakçılar beynəlxalq mentorların iştirakı ilə keçirilən dərslərə qatılıb, “bootcamp” modeli əsasında real layihələr üzərində çalışaraq praktiki bacarıqlarını inkişaf etdiriblər.

Bağlanış mərasimində proqram müddətində yüksək nəticələr göstərən iştirakçılar və yekun hakatonun qalibi olan komandalar mükafatlandırılıb. Proqramı uğurla başa vuran məzunlara “Ironhack” şirkəti tərəfindən beynəlxalq səviyyədə tanınan sertifikatlar təqdim edilib.