İtkin düşən qadının ailəsi danışıb

Bir neçə gün öncə Şəmkir rayonunda 25 yaşlı qadının itkin düşməsi ilə bağlı məlumat vermişdik.

Sabirkənd kənd sakini, 2 uşaq anası olan 1994-cü il təvəllüdlü Tanrıverdiyeva Gülnar Qafqaz qızı 17 oktyabr tarixində saat 11 radələrində yaşadığı evdən çıxaraq bir daha geri qayıtmayıb.

Baku TV-nin əməkdaşları hadisə baş verən ünvanda olub və məsələni onun ailəsindən öyrənməyə çalışıb.

25 yaşlı Gülnar Tanrıverdiyeva günorta saatlarında itib.

Gülnarın anası Elmira Alırzayevanın sözlərinə görə, o, itkin düşməmişdən bir neçə saat əvvəl anasıgilə gedib:

"Qızım yoxa çıxmamışdan bir neçə saat qabaq bizə gəldi. Bir müddət oturandan sonra dedi ki, evimdə işim qalıb və getdi. Günorta saatlarında isə kürəkənim mənə zəng edib Gülnarın bizdə olub-olmadığını soruşdu. Mən də onun artıq bizdən getdiyini bildirdim. Qızımı görənlərdən xahiş edirəm, bizə və polisə məlumat versinlər".

Qeyd edək ki, Gülnar Tanrıverdiyeva iki uşaq anasıdır. Qadın əsəb xəstəliyindən əziyyət çəkdiyindən Bakıda və Şəmkir rayonunda müalicə olunur.

Əlavə məlumat üçün bildirək ki, o evdən çıxarkən əynində qara şalvar, yasəmən rəngli kofta olub. Qadını görənlərdən polisə məlumat vermələri xahiş olunur.