İzləyicilərin rəğbətini qazanan "Haber Global" 7 yaşını qeyd edir

Regional və beynəlxalq informasiya məkanında mühüm rol oynayan, qısa müddətdə böyük uğurlara imza atan “Haber Global” telekanalının 7 yaşı tamam olur.

Qardaş Türkiyədə fəaliyyətə başlayan “Haber Global” qısa zamanda ölkənin aparıcı media strukturlarından birinə çevrilib. İctimai rəyə təsir edən əsas xəbər telekanalları arasında xüsusi mövqe qazanan “Haber Global” mövcud media mühitində özünəməxsus üslubu ilə fərqlənir. Hazırda Türkiyənin ən çox izlənilən xəbər kanallarından biri kimi tanınır və kifayət qədər güclü ictimai-siyasi təsir imkanına malikdir.

Qeyd etmək yerinə düşər ki, “Haber Global”ın yaradılmasına qədər Türkiyədə artıq oturuşmuş xəbər kanalları mövcud idi və onların böyük qismi Britaniya və Almaniya media ənənələrini təqdim edirdi. “Haber Global” isə Azərbaycanın televiziya təcrübəsini, dünya xəbərçilik standartları ilə birləşdirərək, Türkiyə tamaşaçısına yad görünməyən, əksinə, cəlbedici və yenilikçi bir yanaşma təqdim etdi. Məhz bu düzgün strategiya sayəsində kanal çox qısa müddətdə böyük uğurlar əldə etdi.

Deyə bilərik ki, “Haber Global” cəmi 7 ildə Türkiyə xəbər kanallarının 20 ilə keçdiyi yolu geridə qoymağı bacardı. Bu isə Azərbaycanın televiziya ənənələrinin müasir tendensiyalarla uyğunlaşdırılaraq uğurla tətbiq edilməsinin bariz nümunəsidir.

“Haber Global”ın istehsalı olan verilişlər müxtəlif yerli və beynəlxalq festivallarda mükafatlara layiq görülüb. Xüsusilə, Vətən müharibəsi dövründə Azərbaycana göstərdiyi informasiya dəstəyi ilə həm Türkiyə, həm də Azərbaycan tamaşaçılarının yüksək qiymətləndirdiyi kanallardan birinə çevrilib.

Baku TV kollektivi olaraq biz də “Haber Global”ın bütün əməkdaşlarını təbrik edir, fəaliyyətlərində uğurlar arzulayırıq.